Բարսելոնան Լա Լիգայի այս մրցաշրջանում չափազանց հաջող է գործում Նոու Կամպում: Իսպանիայի ընյթացիկ առաջնության առաջին 7 խաղերում թիմն արդեն խփել է 30 գոլ և ոչ մի գոլ բաց թողել: Դա ռեկորդային ցուցանիշ է:

Բարսելոնա 5 - 0 Վիլյառեալ, Բարսելոնա 8 - 0 Օսասունա, Բարսելոնա 5 - 0 Ատլետիկո Մադրիդ, Բարսելոնա 3 - 0 Ռասինգ, Բարսելոնա 0 - 0 Սևիլյա, Բարսելոնա 5 - 0 Մալյորկա և Բարսելոնա 4 - 0 Սարագոսա` ահա այս 7 խաղերի շնորհիվ Բարսան հասավ ռեկորդային ցուցանիշի: Արժե ուշադրություն դարձնել այն փաստի վրա, որ թիմը գոլ բաց չի թողել և, եթե հաշվի առնենք նաև Լա Լիգայի նախորդ մրցաշրջանի խաղերը, ապա արդեն 10 հանդիպում անընդմեջ Վալդեսն անառիկ է պահում սեփական դարպասը ներքին առաջնության տնային հանդիպումներում:

30 գոլից 14 - ը Մեսսիի կատարմամբ

Մեսսին ամենաշատն է աչքի ընկել Նոու Կամպում: Վերոնշյալ 30 գոլերի գրեթե կեսը` 14 - ը, Լեոյի հաշվին են: Նա հեթ - տրիկ է ձևակերպել Օսասունայի, Ատլետիկո Մադրիդի ու Մալյորկայի դեմ խաղերում, դուբլի հեղինակ է դարձել Վիլյառեալի և Ռասինգի դեմ հանդիպումներում, ինչպես նաև 1 գոլ է խփել Սարագոսայի դեմ վերջին տնային խաղում: Մյուս 16 գոլերը բաշխվում են հետևյալ կերպ` Վիլյա (4), Չավի և Ֆաբրեգաս (2 - ական), Տիագո, Ալեքսիս, Կուենկա, Ալվես, Պիկե և Պույոլ (1 - ական): Արձանագրվել է նաև 2 ինքնագոլ: Նախ սեփական դարպասն է գրավել Օսասունայի խաղացող Ռովերսիոն, ապա` Միրանդան Ատլետիկո Մադրիդից:

7,5 ամիս առանց բաց թողած գոլի

Միաժամանակ փայլում է նաև թիմի պաշտպանությունը: Այս մրցաշրջանում Վիկտոր Վալդեսն անառիկ է պահել սեփական դարպասը մեկնարկային բոլոր 7 տնային հանդիպումներում, ինչը կազմում է 630 րոպե առանց ընդունած գոլի: Եթե հաշվի առնենք նաև Լա Լիգայի նախորդ մրցաշրջանը, ապա արդեն 10 անընդմեջ խաղ է, ինչ Բարսան Լա Լիգայում` Նոու Կամպում, գոլ բաց չի թողնում: Վերջին անգամ Վալդեսը գոլ է բաց թողել սույն թվականի ապրիլի 9 - ին կայացած Բարսելոնա 3 - 1 Ալմերիա խաղում: